ازاي تعمل بيزنس ناجح

 

 

 

 

خطوات عمل بيزنس ناجح 

من الكتب اللي قرأتها مؤخرا كتاب:

The $100 startup – chris guillbeau

الكتاب بيوضح إزاي ممكن أي حد يعمل بيزنس لو عنده قيمة الحرية ويقدر يقدم قيمة تساعد ناس غيره، الكتاب مقسم ل 3 أجزاء

الجزء الاول:

بيتكلم في الجزء ده إزاي ممكن تجيب فكرة البيزنس، وضح فيه أن معظم الناس بتعتقد أنك علشان تعمل بيزنس فلازم تاخد قرض كبير من البنك أو تشوف حد يمولك.

دلوقتي بسبب التقدم التكنولوجي بقى سهل قوى أنك تعمل بيزنس معتمد على شغفك، يعني ممكن تحدد إيه الحاجة اللي بتحبها وتقدر تفيد بها الناس وتبقى هي دي فكرة البيزنس بتاعك، علشان يؤكد النظرية بتاعته درس أكتر من واحد نجح يعمل بيزنس معتمد علي شغفه، معظم الناس دي بدأت فكرتها بأقل من 100 دولار وأقصى عدد للموظفين عندها مش بيزيد عن 5 ومعندهمش مهارات خارقة.

وضح برضه أهمية أنك متخليش العميل هو اللي يعمل المنتج فالعميل بيبقى عايز يشتري خدمة أو منتج علشان يريح نفسه مش علشان يعملها هو، مثال لكده المطاعم اللي بتخلي الناس هي اللي تطبخ مش بتنجح قوى.

مهم أنك توضح المنتج بتاعك هيحل مشكلة إيه عند العميل مش مجرد توضح خصائص المنتج.

لو عندك أكتر من فكرة ادرس إيه الفكرة اللي الي هتفيد الناس أكتر وهتبقى عايزة تشتريها

 

الجزء التاني:

 

في الجزء التاني بيتكلم عن إيه اللي تعمله بعد ما حددت الفكرة …اتكلم على اكتر من حاجة زي:

متضيعش وقت في عمل خطة للبيزنس…ابدأ على طول ولو بحاجة صغيرة..هتعدل من أسلوبك مع الوقت.

أهمية التسويق قبل ما منتجك يبقى جاهز وأهمية أول عملية بيع.

 إزاي تعمل عرض للمنتج بتاعك يبقى صعب أي حد يرفضه.

 علشان تعمل عرض زي كده لازم تبقى فاهم العميل كويس وتديله قيمة أكبر من سعر المنتج.

إيه اللي تعمله لما تبدأ البيع الفعلي لمنتجك.

أهمية أنك تسوق لمنتجك وفي نفس الوقت تطور منه، يعني متفضلش حاجة عن التانية.

 

الجزء التالت:

 

في آخر جزء من الكتاب اتكلم إيه اللي تعمله بعد ما خلاص بقى عندك منتج وبدأت تبيعه، اتكلم عن:

 إزاي تزود أرباحك.

 ممكن تعمل أكتر من منتج أو خدمة مرتبطة بمنتجك الأساسي.

 اهتم بالعملاء اللي اشتروا وشوف احتياجاتهم إيه واعملهم منتجات تانية.

 أهمية أنك تخصص على الأقل 45 دقيقة يومياً علشان تطور البيزنس بتاعك وأنك متنشغلش بتفاصيل البيزنس عن الصورة الإجمالية.

أهمية أنك تراقب مؤشرات البيزنس بتاعك بشكل دوري.

في آخر الكتاب اتكلم أن المانع الرئيسي أن الناس مش بتاخد أول خطوة في أنها تعيش حريتها وتعمل البيزنس الخاص بها هو الخوف وأنها بتسمع للآراء السلبية من الناس اللي حواليها.

الكتاب مليان قصص ناس نجحت بالفعل في أنها تعمل البيزنس بتاعها من أفكار بسيطة وفيه تطبيقات عملية كتير لو طبقتها هتنجح تعمل البيزنس الخاص بك بأقل من 100 دولار.